“المندرة” تعقد مواجهة بين “داية” اعتزلت الختان وأخرى اتخذته “عقيدة”

**الداياتان المنياويتان تقران بوقوع حالات نزيف للعديد من الفتيات عقب ختانهن

**الداية المعتزلة: الحملات المناهضة للختان لا تصل للقرى.. والأخرى: وراها ستات ميهمهاش غير مظهرها

 

المنيا: رشا علي

91% هي النسبة التي حصدت بها مصر المركز الأول عالميَا للدول التي تجري عمليات ختان للفتيات، وفقًا لآخر تقرير نشرته منظمة الأمم المتحدة للطفولة “يونيسيف”، فعلى الرغم من التكثيف الإعلامي والحقوقي على مدار سنوات بوجوب وقف ختان الإناث لما يترتب عليه من أضرار صحية ونفسية على الفتيات، إلا أن العادات المصرية تظل هي الرابح في المعركة.

 

وكما يوجد وراء كل رقم قياسي يتم تحقيقه في العالم بطل، فإن الداية وحلاق الصحة هما الأبطال الرئيسين والعامل الرئيس لتحقيق تلك النسبة العالمية التي حققتها مصر في عدد عمليات التي يتم إجرائها.

 

“المندرة” أجرت مواجهة بين سيدتين من المنيا؛ إحداهما قررت الاعتزال والبعد عن تلك المهنة، وهي نبوية سيد (55 عامًا) التي كانت تعمل “داية” قبل أن تقرر اعتزال المهنة وتتجه لمناهضة ظاهرة الختان شكلًا وموضوعًا، والأخرى هي سيدة أحمد (49 عامًا) التي تعمل “داية” هي الأخرى منذ 25 عامًا.

 

**لماذا اتجهتِ للعمل بالختان؟ ومتى كانت البداية؟

نبوية: بدأت أشتغل في الختان من 30 سنة، واعتزلت المهنة من 15 سنة. اتعلمت المهنة على إيد جوزي اللي كان شغال حلاق صحة، وبعدين الستات بدأت تطلبني عشان أعمل العمليات دي لبناتهم، باعتبار أن نسبة كسوف البنات من الست اللي هتعمل لها العملية أقل من الراجل، وبعدين سبت المهنة بعد ما حصل لواحدة من البنات اللي بعمل لهم العملية نزيف.

سيدة: بدأت الشغلانة من عشرين سنة، ولسه بشتغلها لحد دلوقتي. اتعلمت المهنة من أمي اللي كانت بتشتغل داية هي كمان، فأخدت المهنة عنها بالوراثة باعتبارها جزء من عاداتنا اللي بتحافظ على عفة البنات.

 

**كيف تتم عملية الختان؟

نبوية: الختان بيتم عن طريق بتر الزيادات بموس للحلاقة، وبعدين تراب من الفرن البلدي عشان نكبس الدم، وأصعب أنواع الختان هو الختان السوادني اللي بنقفل فيه الجهاز التناسلي كله، ما عدا فتحة صغيرة للتبول.

سيدة: لسه بستخدم موس الحلاقة في البتر، بس ضفت عليه أدوات طبية اتعلمتها من فترة شغلي مساعدة لدكتورة، زي البنج، عشان أواكب التطور، لكن بطلت استخدم تراب الفرن البلدي.

 

**ما الدافع وراء العمل بتلك المهنة رغم الدعوات الكثيرة للقضاء عليها؟

نبوية: اتعلمت المهنة من جوزي وسبتها أما بنت حصل لها نزيف.

سيدة: الختان جزء من عاداتنا وتقاليدنا ومرتبط بحسن سير البنت وسلوكها؛ البنت ملكة في بيت أبوها، ولازم نحافظ عليها حتى من نفسها، لأن الختان بيحد من الرغبة الجنسية عندها، وعدم ختانها بيؤدي إلى انحرافها عن طريقها الصحيح.

 

**هناك دارسات تؤكد أن ظاهرة الختان بدأت تقل. باعتبارك ممارسة للمهنة كيف ترين الوضع؟

نبوية: شايفة أن الظاهرة هتقل مع الأيام، وهي قلت بالفعل حتى ولو بنسبة صغيرة؛ وعلى الرغم من أن في قرى لسه محتفظة بعاداتها، إلا أن ندرة الحالات اللي بيتعمل لها ختان في سن صغيرة تدعو للتفاؤل.

سيدة: عمليات الختان بدأت تقل من6 سنين، بس رجعت تاني بعد الثورة، وحفلات الطهور الجماعي لبنات العائلات بدأت ترجع في قرى كتير، ولسه مستمرة لحد دلوقتي وبيكلموني عشان أعملها لبناتهم.

 

**هل تعرضت إحدى الحالات التي قمتِ بختانها للنزيف من قبل؟

نبوية: آه. في مرة كنت بعمل ختان لبنت عندها 8 سنين، ومكنتش عايزة أعملها الأول بس والدتها أصرت على ختانها هي وأختها، والبنت حصل لها نزيف واتنقلت على المستشفى.

سيدة: آه. حصلت كذا مرة بس الموضوع كان بسيط وقدرت اتعامل معاه. لكن ضعف البنات بيخلي الموضوع صعب، خصوصا أن الأهالي بتصمم على ختان البنات في سن صغيرة. وعشان كده لازم أتفق مع أهل البنت إني معفية من أي مسؤولية قبل ما أعمل العملية.

 

**من شروط إجراء عملية الختان أن يتم عمل كشف طبي للتأكد من احتياج الفتاة للعملية، هل واجهتِ أي حالة رفضت إجراء الكشف الطبي؟

نبوية: قبل ما أسيب المهنة، كنت بطلب من الأهل يروحوا يكشفوا عند الدكتورة، وأعمل أنا العملية بمبلغ أقل، بس الأهالي كانوا بيرفضوا فكرة إن بنتهم تروح لدكتورة نسا في سن صغيرة.

سيدة: معملتش كشف طبي قبل كده ومحدش طلب مني أعمل لبنته كده.

 

**كيف ترين الحملات التي تناهض ختان الإناث؟

نبوية: شايفة أنها مش بتوصل للبنات في القرى. والحملات دي بتتعمل عشان الصحفيين والشخصيات اللي هي أصلًا واعية. والريف محتاج يتعمل فيه جلسات وندوات في المساجد عشان توصل للبنات الصغيرة وربات البيوت، بالإضافة إلى أن التلفزيون أسرع وسيلة لتوصيل الفكرة.

سيدة: شايفة أن اللي بيعمل الحملات دي ستات مش بيهتموا بأي حاجة غير مظهرهم. هما مش عارفين حاجة عن أخلاقياتنا أو عاداتنا، وكل اللي بيقولوه في الندوات دي ملوش لازمة، وأنا مش بجبر حد إنه يعمل العمليات دي لبناته، ومش هسيب مهنتي.

You must be logged in to post a comment Login