منسق حملة صباحي بالبحر الأحمر لـ “المندرة”: مرشحنا سيكسب أصوات المحافظة

**صباحي شخصية ثابتة على مواقفها مع الناس

**مرشحنا هو الشخصية الوحيدة المتواجدة من قبل ثورة 25 يناير

 

البحر الأحمر: عزة عبده

في الوقت الذي يفصلنا فيه يومان عن الانتخابات الرئاسية رصدت “المندرة” الأجواء الانتخابية في أكبر المحافظات السياحية وهي البحر الأحمر، وذلك من خلال إجراء حوارات مع منسقين حملتي عبد الفتاح السيسي وحمدين صباحي بالمحافظة وخاصة مع اشتداد المنافسة بينهم وتأكيد كل منهم ثقته بفوز مرشحه وحصوله على أغلب أصوات البحر الأحمر، في حين أثار بند تقسيم البحر الأحمر الذي أعلنت عنه حملة السيسي استياء الكثيرين مما دفع حركة “6 إبريل” لإصدار بيان استنكاري بشأن القرار، وجاء نص حوار “المندرة” مع ياسر زوقن، منسق حملة المرشح حمدين صباحي بالبحر الأحمر كالتالي:

 

**في البداية.. لماذا اخترت حمدين صباحي لدعمه في الانتخابات الرئاسية؟

حمدين صباحي هو الشخصية الوحيدة المتواجدة من قبل ثورة 25 يناير ولحد دلوقتي بتصرخ بأعلى صوت ضد الفساد، وفي كل الأوقات كان بيدفع ضريبة من حياته مختلفة عن اللي قبلها سواء بالسجن أو سنين الكفاح اللي عاشها طول فترة وجوده في البرلمان، هو يعتبر ممثل الثورة ضد أي فاسد من قبل 25 يناير.

 

صباحي شخصية ثابتة على موقفها مع الناس في مواجهة الفساد المنتشر في المجتمع وهو ده اللي المحافظة محتاجاه. الشخص اللي يعترف بمكانة ثورة 25 يناير هو اللي قادر علي اكتشاف الفساد ومحاربته وده كله موجود في مرشحنا.

 

**متى بدأت الحملة في البحر الأحمر أعمال الدعاية لمرشحها؟

الحملة بدأت متأخر في أعمال الدعاية لحمدين وده بيرجع لظروف كتير تتعلق بالماديات، وطبعا معروف إن كل الإمكانيات ما قلت بتقل فرصة الدعاية للمرشح الرئاسي، بس بعد فترة مش طويلة زاد عدد الشباب المشاركين في الحملة والمعنويات ارتفعت عندنا كلنا وكنا مستمتعين جدا في كل الفعاليات اللي بنعملها.

 

الحملة فيها مجموعة من الشباب النشيط اللي بيرفض موجة التوجيه السياسي الإعلامي اللي بنتعرض لها حاليا وبيرفضوا المغريات اللي بيتعرضوا لها من الجانب التاني.

 

**هل تتم مراعاة ظروف المحافظة السياحية في الفعاليات السياسية للحملة؟

معظم الموجودين في الحملة سبق وعملوا في المجال السياسي في البحر الأحمر وعندهم خبرة كافية تخليهم يتصرفوا بحكمة في الفعاليات بحيث نقدر نوصل للهدف المطلوب من غير أي ضرر أو أذى مهما كان بسيط.

 

وموجود في الحملة ناس شغالين في السياحة نتيجة وجودهم في البحر الأحمر وده بيخليهم مدركين مدى احتياجها للعنصر الأجنبي وبالتالي المحافظة علي وجوده. كل اللي في الحملة فاهمين كويس يعني ايه عمل سياسي في شارع سياحي.

 

**ما مدى تفاعل السائحين الموجودين بالبحر الأحمر مع فعاليات الحملة؟

لحد دلوقتي منقدرش نقول إن في إقبال ملحوظ من السياح لكن في بعض الأحيان أما بيكون في فعالية بيتصوروا مع الحملة والمشاركين فيها، وهما فاهمين إن الفترة الحالية مصر بتشهد انتخابات رئاسية جديدة من نوعها.

 

**في رأيك.. ما الذي تحتاجه المحافظة من الرئيس القادم لاستعادة مكانتها السياحية كما كانت من قبل؟

البحر الأحمر علي وجه الخصوص تحتاج نظام من نوع خاص وهو مبدأ الثواب والعقاب في كل المجالات وده بيساعد علي تطبيق صدى ثورة 25 يناير. فيه كم كبير من الفساد موجود في كل المجالات ومحتاج مجهود كبير عشان نقضي عليه خاصة المحليات الموجود في المدن والمجالات اللي بتمس السياحة، طبعا ده بجانب إن الغردقة بالتحديد كانت مستودع فساد ولحد دلوقتي مفيش حد اتحاسب على حاجة.

 

**هل هناك مشاركة من جانب الحملة مع الحملة المركزية بالقاهرة لتقديم مشروعات مستقبلية في حالة فوز مرشحكم لإعلاء مستوى المحافظة؟

صباحي زار المحافظة أكتر من مرة قبل كده وعارف مشاكلها والمشاريع التطويرية اللي محتاجاها عشان ترجع زي ما كانت قبل أيام 25 يناير لرونقها السياحي.

 

مرشحنا مدرك لمشكلة بطء البنية الأساسية للغردقة علي وجه التحديد وباقي المدن عامة، وإن البنية الأساسية للشارع السياسي مش مكتملة سواء في وسائل المواصلات أو أمن السياح نفسهم وإن الجوانب دي لما تتعالج الرواج السياحي هيرجع تاني.

 

**ما هو تأثير وجود 3 حملات للمرشح المنافس في البحر الأحمر مقابل حملة واحدة لصباحي؟

احنا بنعتمد على نفسنا من البداية بغض النظر عن العدد اللي بيدعم المرشح المنافس في مسرح استعراض رأس المال.

كمية الدعاية المصروفة على المرشح المنافس في الغردقة لوحدها مش ممكن مقارنتها أبدا بإمكانيات حملتنا لكن المواطن البسيط لما بيقابل شباب الحملة اللي معندهمش إمكانيات مادية لكن بيبذلوا أقصى طاقاتهم في الفعاليات وتعليق الملصقات بيحس إنهم الأفضل لإيمانهم الكبير وإصرارهم غير الطبيعي لدعم مرشحهم.

 

**هل يوجد تنسيق بين الحملة وحملة المرشح المنافس والجهات الأمنية بالبحر الأحمر أثناء تنظيم الفعاليات؟

لحد دلوقتي مفيش مشاكل حصلت في الفعاليات مع أي جهة سواء أمنية أو منافسة، البحر الأحمر مش كبيرة والناس بتشارك في الفعاليات ومفيش عداوة مع أي حد.

 

**إلي أي مدى تشارك الحملة في المحافظة بدور رقابي علي العملية الانتخابية القادمة؟

بنشارك بـ 109 مندوب رقابي تابعين للأقسام الموجودة في المدن وده لإن عدد لجان الاقتراع في المحافظة هو 109 مقسمة علي 7 مدن وبتشارك فيها الحملة بمندوبين رقابة لاستقبال أي جديد في اللجان الانتخابية في غرفة العمليات.

 

واللي مضايقنا هو عدم تحديد اللجنة العليا للانتخابات اذا كان يومين الانتخابات أجازة رسمية لجميع القطاعات أو لا، وده سبب لنا مشكلة في وجود أشخاص للرقابة في اللجان خاصة مع ظروف المحافظة حاليا وصعوبة الأجازة حتى لو كانت قصيرة، لكن احنا بشكل أو بآخر غطينا الموضوع بمندوبين لاستيعاب عدد اللجان.

 

أخيرا.. في رأيك من هو المرشح الفائز بأعلى نسبة أصوات في البحر الأحمر، ولماذا؟

أتوقع فوز صباحي بأعلى أصوات في البحر الأحمر وده لاختلاف طبيعة أهالي المحافظة سواء مثلا مدينة رأس غارب اللي فيها عدد كبير جدا من العمال في مجال البترول، أو القصير اللي بتمتلك عمالة كبيرة لكن من نوع تاني والغردقة اللي فيها عدد كبير شغالين في السياحة، وتعدد الطبقات العمالية بيوضح للناس إن صباحي هو الأصلح.

 

والناس بتلاحظ عدم تكافؤ إمكانيات الحملات من وسائل الدعاية والتمويل والإعلام وهيختاروا الأصلح، والانتخابات اللي فاتت كانت البحر الأحمر أكبر محافظة دعمت صباحي.

 

يمكنك قراءة حوار “المندرة” مع منسق حملة المرشح الرئاسي عبد الفتاح السيسي في البحر الأحمر من هنا.

You must be logged in to post a comment Login