منسق حملة المشير بالبحر الأحمر لـ “المندرة”: لا توجد شخصية أجمع عليها الشعب كالسيسي

عبد الفتاح السيسي

عبد الفتاح السيسي

**البحر الأحمر تحتاج مقومات كثيرة لاستعادتها سياحيا وسياسيا

**حملة السيسي تعتمد على التمويل الذاتي من أعضاءها

 

البحر الأحمر: عزة عبده

في الوقت الذي يفصلنا فيه يومان عن الانتخابات الرئاسية رصدت “المندرة” الأجواء الانتخابية في أكبر المحافظات السياحية وهي البحر الأحمر، وذلك من خلال إجراء حوارات مع منسقين حملتي عبد الفتاح السيسي وحمدين صباحي بالمحافظة وخاصة مع اشتداد المنافسة بينهم وتأكيد كل منهم ثقته بفوز مرشحه وحصوله على أغلب أصوات البحر الأحمر، في حين أثار بند تقسيم البحر الأحمر الذي أعلنت عنه حملة السيسي استياء الكثيرين مما دفع حركة “6 إبريل” لإصدار بيان استنكاري بشأن القرار، وجاء نص حوار “المندرة” مع الدكتور سامح ذكي، منسق حملة المرشح عبد الفتاح السيسي بالبحر الأحمر كالتالي:

 

**متى بدأت حملة “كمل جميلك يا شعب” بالبحر الأحمر أعمالها؟

من وقت ظهور المرشح الرئاسي عبد الفتاح السيسي بموقفه المشهود مع شعبه اللي كان في أمس الحاجة لظهور راجل يحمي البلاد ويجمعها بكلمة واحدة محدش يقدر على يكسرها أو يناقشه فيها، واللي يقرر الظهور عشان ينقذ شعب يستحق الوقوف معاه لحد ما يوصلنا لبر الأمان.

 

**من وجهة نظرك.. لماذا تم اختيار السيسي للترشح لانتخابات رئاسة الجمهورية في هذه الفترة؟

مبدئيًا لازم الكل يسلم ان مفيش مرشح في الانتخابات هيقبل إنه يكون جزء كبير جدا من أولويات الدولة هي مسئوليات عسكرية عشان البلد محتاجة اهتمام عسكري شديد، والسيسي عنده الخبرة العسكرية التي تؤهله إنه يكون رئيس.

 

والسيسي قدر يحقق تأييد جماهيري ضخم وده بيشكل خطر على بعض المرشحين أو كره داخلي، ومفيش حد من المرشحين الحاليين يصلح للرئاسة وكفاية إنه أبطل مفعول أكبر مؤامرة اتدبرت لمصر.

 

**هل هناك بعض الأمور التي تتم مراعاتها أثناء عقد أية فاعلية بالبحر الأحمر باعتبارها محافظة سياحية هامة؟

طبعا فيه بعض الأمور التي بنراعيها وقت وضع الملصقات أو توزيع الكتيبات لإننا لاحظنا نفور بعض الأجانب من وجود مسيرة أو مظاهرة، ولازم نلتمس لهم العذر لأنهم ممكن يكونوا اتعرضوا لبعض المضايقات خلال مظاهرات الرئيس السابق مرسي.

 

وبالنسبة للأماكن اللي بنعمل فيها الدعاية الخاصة بمرشحنا فهي الغردقة والقصير ورأس غارب، وأكدنا علي أعضاء الحملة مراعاة المنظر العام للمحافظة وان محدش يحط ملصقات علي الحيطان وعواميد النور أو بوابات المنازل، كل اللي بنعمله هو لزق الملصقات علي ألواح خشب فوق سطح البيوت العالية عشان نحافظ على نظافة الشوارع زي ما هي، وعشان منكلفش المحافظة مبالغ كبيرة بعد الانتخابات.

 

وفيه نقطة مهمة وهي إن الناس في الوقت الحالي مش محتاجة دعاية لمرشح معين قد احتياجهم لدعاية توضح لهم ضرورة المشاركة في الانتخابات وأهميه صوتهم وعدم الاستسلام لأي صوت سلبي يجبرهم علي الانحياز لجانب معين والتخلي عن دورهم كناخبين، وده الجانب اللي بنشتغل عليه حاليا مع الناس في الشوارع من خلال توزيع كتيبات توضح كل ده.

 

**هل كانت هناك خطة معينة لتقسيم المدة المحددة للدعاية الانتخابية علي مدن البحر الأحمر؟

طبعا، النظام هو سر أي كيان فعال وناجح ونظامنا في الحملة هو تقسيم المدن علي الأفراد اللي عندهم خبرة ومعرفة عنها، أنا ومجموعة معايا شغالين على الغردقه ومجموعة رأس غارب مختصة بمدينة رأس غارب وهكذا، كله شغال بمجهوده الذاتي عشان نحقق نجاح مرشحنا في الانتخابات.

 

**مع وجود أكثر من حملة لدعم السيسي في البحر الأحمر، هل يسبب هذا إزعاج لديكم باعتباركم الحملة الشعبية الرسمية؟

كل واحد حر يعمل اللي هو عايزه، أهم حاجة دعم الحملة وتوسيع شعبية السيسي لكن الجزئية اللي المفروض نأكد عليها دايما هي إلغاء كلمة (أنا) لإنها بتضيع أي مجهود جماعي، ووجود أكتر من حملة لدعم السيسي سواء كانت في الغردقه أو سفاجا أو غارب أو مدن الجنوب كلها هدفها واحد وهو تقوية موقف المرشح والتأكيد علي ضرورة نجاحه.

 

**هل هناك دعم من رجال الأعمال والمستثمرين بالبحر الأحمر للحملة؟

مفيش أي دعم للحملة من رجال الأعمال أو المستثمرين الكبار في البحر الأحمر بالعكس دعمها ذاتي من أعضائها وكل حملات الدعاية التي اتعملت واللي هتتعمل بعد كده بدعم الأعضاء بس. كل واحد بيشتغل بمجهوده ولو كان الشخص المشارك مفيش معاه ماديات كفاية بيشارك بمجهوده ويخلص الأعمال المطلوبة منه.

 

**من وجهة نظرك كمنسق عام للحملة.. ما الذي تحتاجه البحر الأحمر لاستعادتها كمحافظة سياحية كسابق عهدها؟

فيه حاجات كتير مفروض نتخلص منها عشان البحر الأحمر تليق بلقب محافظة سياحية زي فساد المحليات وهي معروفة على نطاق واسع جدا، والمجال الصحي محتاج إعادة نظر لإن وجود مكتب صحة واحد في الغردقة علي سبيل المثال مش كفاية، ومستوى خدمات العيادات الخاصة والعامة ضعيف جدا والأدوية المتاحة ليها بدائل فعالة أكتر ومستوى الرعاية في المستشفيات العامة والخاصة كمان ضعيف.

 

وكمان فكرة استغلال الكفاءات الموجودة في المحافظة في العمل السياحي مهمة جدا وليها تأثير كبير حاليا وعلى المدى البعيد، ولكن اللي بيحصل هو استسهال وتعيين عمال أجانب أو عمال مصريين معندهمش كفاءة، وفيه عدد كبير من خريجين معاهد السياحة والفنادق في البحر الأحمر متدربين على أعلى مستويات خدمة النزيل لكن مشكلة المعارف والواسطة هي اللي بتمنع تعيينهم.

 

**هل هناك مشروعات مقدمة من الحملة لرفع مستوى المحافظة كمحافظة سياحية ودعم موقف المرشح الرئاسي؟

فيه مشروعات كتيرة جدا من المقرر تنفيذها لكن مينفعش أكشف عنها في الوقت الحالي لإنها ضمن برنامج المشير السابق وهترفع مستوى السياحة في المحافظة ونسبة مشاركة الشباب في الحياة بكل مجالاتها وهتدعم موقف المرأة اللي هي العمود الفقري لأي أمة.

 

**كم عدد الجهات المشاركة في الحملة؟ وهل هناك مشاركة من جانب “تمرد” البحر الأحمر؟

عدد المشاركين معانا في الحملة كبير جدا وصل لـ 32 حملة وحزب وحركة وجمعية لكن علي مستوى البحر الأحمر بيختلف العدد بس مش اختلاف كبير يعني بيشارك معانا حزب الغد، حزب المؤتمر، حزب مصر بلدي، حزب الحركة الوطنية، حملة كمل جميلك يا شعب، وجهات تانية بتسعى بكل مجهوداتها لدعم السيسي.

 

ومفيش أي مشاركة من أعضاء حملة “تمرد” في البحر الأحمر وعرفنا إن مفيش فرع للحملة الرئيسية هناك لكن ده ميقللش من شأن الحركة نفسها بالعكس كلنا بنحترمها لإنها كانت السبب الأساسي في إننا نتخلص من الإخوان.

 

**أخيرا.. هل تتوقع أن يحصد عبد الفتاح السيسي عدد أصوات يجعله يفوز بالرئاسة؟

أكيد، عدت سنين كتير مشفناش خلالها شخصية أجمع عليها ناس كتير زي السيسي، ومفيش شخصية اتجمعت كل طوائف الشعب علي مطالبها زيه، ده غير إن هو الوحيد اللي أصر إن كل طوائف الشعب تشاركه في القرارات المصيرية اللي بياخدها.

 

يمكنك قراءة حوار “المندرة” مع منسق حملة المرشح الرئاسي حمدين صباحي في البحر الأحمر من هنا.

You must be logged in to post a comment Login