شهادتي عن الإجتماع التحضيري لحملة دعم الدستور

مصطفى سباق

مصطفى سباق

القصير: مصطفى سباق

 

**المقالات المنشورة تعبر عن رأي صاحبها فقط ولا تعبر عن رأي بوابة المندرة.

 

من اسبوع فات كنت في اجتماع في قنا كان بيضم محافظات ” قنا و البحر الاحمر و سوهاج ” .. انا كنت رايح الإجتماع بدعوه اتوجهتلي من احد الأفراد يدعي ” محمد ” و كان الموضوع اللي هنتكلم بخصوصه ” مفوضية الشباب ” و قلي في التليفون بالحرف الواحد انه مش محتاج شباب له اتجاهات سياسية او منتمي لأحزاب أو حركات بعينها يفضل انهم يكونوا محسوبين علي النظام السابق ” فلول ” , اتفاجأت بالكلام و قررت اني احضر الإجتماع و جمعت كام واحد معايا بالفعل و حددولنا مكان الإجتماع بقنا , الإجتماع كان في فندق البسمة علي كورنيش النيل و كان بيضم محافظات ” قنا و البحر الاحمر و أسوان ”

 

اللي كان بيرأس الإجتماع ” محمد بدران ” عضو لجنة الخمسين و رئيس اتحاد طلاب مصر ”

 

لما ابتدي يتكلم عن الفكره قال اننا لازم نوصل ل 90 % في التصويت اللي جاي علي الدستور

و دا كله علشان العالم كله يقتنع ان اللي حصل في مصر يوم 30\6 ثورة مش انقلاب

 

اعضاء لجنة الخمسين ” الا من رحم ربي ” ابتدوا يشتغلوا علي الأرض و يسوقوا للمنتج بتاعهم و لما ابتدينا نعارض و نتكلم في بعض المواد زي المحاكمات العسكرية للمدنيين اكتشفنا للأسف ان استاذ محمد بدران مش عارف حتي نص الماده و انه حضر التصويت علي الماده و صوت كمان بنعم .. ناقشتهم في نقطة ازاي انا اروح اقول نعم و اوجه الناس بكدا من غير حتي ما اشوف المسودة النهائية للدستور , ردا استاذ محمد بدران ” إن الدستور دا مش هيقعد اكتر من 3 سنين و انه االدستور دا ممكن يتعدل بعد كدا ” نفس ردود الإخوان علي دستورهم ” و ان مجلس الشعب الجاي هيغير الدستور , دا

لما ابتدينا نتكلم و نتناقش و نسأل اسئلة للأسف من حقنا لقينا احد المنظمين بيبعتلنا واحد يقلنا ياريت تخفوا علي الراجل شوية

 

اكتشفنا ان مش دا اول اجتماع يحصل للتنسيق للموضوع و كان سبقه اجتماع في محافظة اسوان و ضم محافظتي الأقصر و اسوان

 

حصلت لبلبه في القاعه و ناس كتير اعترضت علي الأسلوب اللي هيتعبوه في حشد الناس

 

اللي كانوا بيرأسوا الإجتماع حطوا ميزانية مفتوحه لكل محافظة و امكانيات الدولة كلها هتخدم حملتهم بس كان كل المطلوب من كل محافظة انها تحط خطة شاملة المحافظة كلها دا حتي استاذ محمد بدران قلنا بالنص لو محتاجين ” 30 كوستر ” في مكان ما احنا نقدر نوفرهم و دا بالإضافه لمقر للحملة و عربيات هتشتغل مع منسقي الحملة طول الفترة القادمة و لحد يوم التصويت .. دا حتي اتكلموا عن انتهاكات قدام اللجان ممكن تحصل و توجيه للناس

 

اللي حابب اضيفه و دي نقطه مهمه جدا الموضوع كان اساسه اختيار مجموعات شبابية لعمل ما يسمي بمفوضية الشباب بدعم من الدكتور مصطفي حجازي و اللي وثلنا في نهاية الإجتماع ان الناس دي بتقايضنا يا اما تشتغلوا في موضوع حملة ” دعم الدستور ” او مش هيتم اختياركم للمفوضية اللي هتراقب اداء الحكومه في المحافظات

 

* اخر نقطه حابب اضيفها ” الإجتماع كان اشبه بجلسات الحزب الوطني ”

 

You must be logged in to post a comment Login