التوب البلدي

عبد الباسط محمد

عبد الباسط محمد

 

**بقلم: عبد الباسط محمد* – قنا

 

مالناش أيام وساعات معدوده

هدتنا الغربه وأشتقنا العـوده

وحشتنا اللمه وكلمة ياأمه

والتوب البلدى ولف العـمه

وحبيبتي الصابره أم رموش سمره

المشتاق طرف عنيها السوده

مشتاق للجرن وعيش الفرن

السخن البُر المتشمس

ولفحل بصل مع نحل عسل

علي صحن مدمس ونغـمس

مشتاق للضحكه فـ وسط الصحبه

علي دكه وكنبه بفـرشة حصير

للقعده الأرضي ف بيتي وأرضي

لشربة ميه ف كوز م الزير

حنيت لأبوى وعمي وأخوى

ولعـب عصاية جـدى العـوجه

ولريحة النهر ف نص الشهر

والقمره بتسـبح ف الموجـه

حنيت للغيط وحيطان البيت

وعيال حـتتنا وشقاوتها

لكلام وحديت وحجاوى حواديت

الخوف م الغولة وعفاريتها

وحشتني طريقنا القُبلية

والخضرة الطارحه علي الجانبين

حمحمة الطير الجبلية

ف الولف مابين عشق حمامتين

وحشتني السهره ف ليل الحضره

ورقص المُهره علي المزامير

وتسالي ياحمص لـب وترمس

وحــلاوة الـمولد والصفافير

 

*شاعر غنائي

 

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *