المنشأ

عبد الباسط محمد

عبد الباسط محمد

 

**بقلم: عبد الباسط محمد* – قنا

هويتي مصرى وصعيدى
قناوى الجد والمنشأ
لا قلت لعـبد يا سـيـدى
ولا للزُل يوم بعـشـق
ماليش ف اللف والدوران
دوغرى ما أحبش الخرابيط
ولا ف سـياسـه ليّ مكان
غير ف الآرض جوه الغيط
أنا والرزق متفقين
أركب رجلي وأسعاله
ف صحرا أقابله ولا ف طين
ما بتكبرشي علي حاله
مابأكلش ف كته مفلوته
ولا حظي معاى مكرى
وبين دراعاتي مفروطه
كنوز الدنيا علي حجرى
ف عز الولعه والقيله
وقرص الشمس نار حمره
تطرشق حبة الفوله
بفاسي ف أرضنا السمرة
محزم شُقتي قايش
سلاحي همتي و كفي
بقلب رزقي بتعايش
ورامي الهم ورى كتفي
عايشها بعرقي وبكدى
وراضي بحالي ونصيبي
مامديتش ف يوم يدى
وقرش حرام دخل جيبي
مابتمسخرشي وأدلع
وأقضي حياتي ضحك هزار
ووقت الجد اتمنع
وأسيب الدنيا تولع نار
ما أبطش أمشي ف المزقي
وأتلتح نفسي ع الدرابيس
وأوقع عمتي ف عشقي
وأبيع نفسي لحد رخيص
أشعـلق روحي ع الفاضي
وأعيش الوقت بالمقلوب
أسوق الحزن ف عنادى
وأبات بجروحي فيه مغلوب
وأجيب اللوم علي غيرى
أعيب في الدنيا ليها أشكي
بقلة رزقي عن غيرى
وأعدد ف النواح أبكي

 

*شاعر غنائي

 


موضوعات ذات صلة

You must be logged in to post a comment Login