بالفيديو:‘‘المندرة’’ مع أقدم عطار بسوهاج: نعالج الكسور والإجهاض والجلدية

**عم سعيد: العطار أصبح شبيه بالسوبر ماركت.. وأعتبره ‘‘كار’’ وليس مهنة

**وصفات العطار الحقيقي أفضل من علاج 100 دكتور

 

سوهاج: شيماء دراز

سبعة أشهر من العلاج الطبيعي، يستبدلهم ‘‘عم سعيد’’ بأيام قليلة من وضع ‘‘اللبخة’’ التي يصنعها بيديه المحترفتين، المعتادتين على التعامل مع مواد يعتبرها كنوز، قدر قيمتها، إلى أن رفعت قيمته، إلى ‘‘شيخ العطارين’’ بسوهاج، الحاج محمد سعيد فتح الله.

 

**كيف اكتسب عم سعيد لقب ‘‘شيخ العطارين’’؟

ورثت العطارة عن جدودي، وبشتغل فيها من سنة 52، لما تركت المدرسة وسني 12 سنة، شربت المهنة وعرفت أسرارها وحكاية كل صنف فيها، أنا أقدم عطار في سوهاج، وعلمت كتير من العطارين، ومعظمهم بيلجأ لي لما حد يطلب منه وصفة، فسموي شيخ العطارين.

 

**ارتبطت العطارة بالدجل والشعوذة وطلبات غريبة للجن.. فكيف ترى ذلك في سوق العطارة؟ وما أشهر الطلبات؟

(ضاحكا) بالتأكيد ببيع طلبات وخلطات الشعوذة والسحر، بس أنا ببيع عطارة وده شغلي بس، ماليش علاقة باللي بيعملوه، بس أنا عارف سبب شراء الطلبات، ومفيش عطار حقيقي ميعرفهاش، ونعرف كل عشب بيتباع الزبون بيبقى محتاجه ليه.

 

وأشهر الطلبات اللي يطلبوها حبر أحمر وزعفران لكتابة العمل أو كتابة حجاب، وعرق الحلاوة وحب الريجة لفك السحر.

 

**ما أكثر أنواع العطارة التي تبيعها اليوم وقديما؟

الآن تباع الشطة والكمون والقرفة، دي أشهر الطلبات، لكن زمان كانت بتتباع الوصفات والأعشاب الطبيعية أكتر.

 

**ما أغلى أنواع العطارة؟ وما قصة وصول سعر بعضها إلى آلاف؟

مفيش أعشاب بيتجاوز سعر الجرام منها آلاف، ده كلام سحر ودجل من المشعوذين، عشان يكسبوا فلوس، وكتير منهم بيتفق مع شخص بيعمل نفسه عطار وبيبيع بالأسعار دي، ويقسموا الفلوس مع بعض.

 

أما أغلى الأنواع، فهي العنبر والزعفران الأسباني، بيتجاوز الجرام منه 170 جنيه، على حسب النوع، وأفضل الأنواع العنبر الصومالي.

 

**العطارة مرادف للطب الشعبي، فما أشهر وصفات العطارة الطبية؟

(بابتسامة الواثق).. ده سر المهنة، بس هقولك منه شوية، فيه وصفات بعون الله لعلاج معظم الأمراض، إن لم تكن كلها، فالله عز وجل لم يخلق داء إلا وخلق له دواء، فمثلا أمراض الجلدية مثل الثعلبة تعالجها العطارة في أربعين يوم بس بإذن الله من خلال وصفة بالأعشاب الطبيعية، كمان فيه وصفة بنوع عشب معين عندي لعلاج الإجهاض وتثبيت الحمل، أحسن وأسرع من أدوية الدكتور، وأرخص كمان.

 

شاهد عم سعيد يقدم وصفة لعلاج الكسور في أيام بدلًا من شهور العلاج الطبيعي

 

**كيف اختلفت العطارة اليوم عنها قديما؟

العطارة كار مش مهنة، وكل عطار كان بيلتزم بأخلاقيات العطارة وتصميم الخلطات ووصفها أحسن من الأطباء، أما دلوقتي أصبحت العطارة مجرد سوبر ماركت بيبيع الشطة والكمون والفلفل والقرفة والحبهان، حتى الأصناف ضاعت نكهتها، وأصبحت كأنها بلاستيك.

 

دلوقتي مفيش عطارين حقيقيين زي زمان، لما كنا بنعمل المفتقة سنين بنفس الطعم والريحة، من أعشاب الروند والكينية، وكانوا بيوزعوها على المرضى في المستشفيات، لأنها مغذية ومفيدة، أما النهارده بيستوردوها بصلاحية سنة ونص، ولا طعم ولا ريحة، وكمان الروند والكينية غليوا، وبقى الدوا أرخص منهم.

 

الكل دلوقتي ماشي على مبدأ (خد من عبد الله واتكل على الله)، لأن الأعشاب ارتفع سعرها جدا واختفى معظمها، وفيه عطارين مش عارفين أصناف كتيرة، ولا أسرارها، ولا حتى يعرفوا إن فيه فروق بين أنواع الصنف الواحد، على حسب طريقة الزراعة والبلد المزروع فيها، وده ميعرفوش غير عطار حقيقي.

 

**بما أن كار العطار تغير.. فهل ستورّثه لأبنائك؟

(بعد لحظات شرود).. العطارة ورث ودم جدودي مينفعش أسيبها، الدم مبيتباعش، أنا علمتها لابني الكبير عشان يورث مهنة أجداده، جمب شغله، مدرس عربي في وزارة التربية والتعليم، عشان يضمن قلبِة الكار.

 

One Response to بالفيديو:‘‘المندرة’’ مع أقدم عطار بسوهاج: نعالج الكسور والإجهاض والجلدية

  1. 3bdo Elsheikh 3:43 صباحًا, 11 فبراير, 2014 at 3:43 صباحًا

    feen El3nwan

You must be logged in to post a comment Login