بالفيديو: الإنشاد بدون موسيقى يعود للظهور بسوهاج ‎

محمد عرفة

محمد عرفة

سوهاج: شيماء دراز

ربما يختلف طريق الموهبة عن الدراسة لدى الكثيرين، فنجد أحد الأشخاص يبدع في مجال ويقصر في الآخر ولكن من الجميل أن نجد أحدهم يبدع في الاتجاهين, فعلى الرغم من دراسة محمد عرفة لطب الأسنان إلا أنه استطاع أن يحصل على المركز الثالث على مستوى الجمهورية في مسابقة الشارقة للإنشاد وسيمثل مصر في المسابقة القادمة بالإمارات.

 

وعن بداية دكتور محمد مع الإنشاد على الرغم من دراسته للطب، يقول: “بدأت مع شيخي اللي كان بيحفظني القرآن وكان بيحب صوتي ويخليني أقرأ له القرآن، وفي الإعدادية كنت بأذن في المسجد لحد الثانوية ودي تقريبا كانت للمذاكرة بس وانقطعت وقتها عن الإنشاد”.

 

ولعبت الصدفة دورا كبير في مشاركة محمد في مسابقة الشارقة، حيث يقول: “عرفت مسابقة الشارقة عن طريق مصطفى عاطف اللي اتعرفت عليه في حفلات رسالة الخيرية بصفتي عضو فيها, وفعلا قدمت في المسابقة وبدأ الموضوع يكبر معايا واتجه للإنشاد أكتر”.

 

وبالنسبة لموقف المنزل من اتجاهه للإنشاد رغم دراسته للطب، فيقول: والدي كان مبسوط باتجاهي للإنشاد ودايما كان بيشجعني وموصيني استخدم صوتي في حاجة كويسة متغضبش ربنا، وكانوا سعداء وفرحانين جدا في البيت بسبب الجايزة، وأنا مش بتمنى حاجة إلا رضاهم عني، وخصوصا إن الإنشاد الديني بيخلي الواحد يلتزم بدينه أكتر”.

 

يمكنك مشاهدة محمد عرفة وإنشاده الديني هنا.


 

وعن كيفية الحصول على جائزة الشارقة وتمثيله لمصر، فيقول: “دي تاني مرة يتنظم فيها مسابقة الشارقة وأنا كنت في فريق الكورال لكن كنت بنشد فردي وبدون موسيقى وده سبب بلبلة لإن كتير قالولي مش هينفع إنشادك لأنك بدون موسيقى وبالفعل لجنة التحكيم عابت عدم استخدامي للموسيقى في الإنشاد لكن الحمد لله ربنا وفقني وقدرت أبقى في المركز التالت”.

 

وعن اتجاهاته في الفترة القادمة وإن كان سيسلك طريق الإنشاد أم طريق الطب فأكد: “أني أخد المركز التالت ده شجعني، وإن شاء الله في الفترة اللي جاية هقدم نوع جديد من الفن وهرجع عصر الإنشاد والابتهالات الدينية من غير موسيقى، ده غير المشاركة في مسابقة الإمارات”.

One Response to بالفيديو: الإنشاد بدون موسيقى يعود للظهور بسوهاج ‎

  1. MOSTAFA HANAFY 2:22 صباحًا, 1 يوليو, 2014 at 2:22 صباحًا

    احسن عرفه ف الدنيا

You must be logged in to post a comment Login